«Feyenoord» hujumchisi Ayase Ueda faoliyatini «Fenerbaxche»da davom ettirishi mumkin.

VI.nl ma’lumotiga ko‘ra, Turkiya klubi 27 yoshli yaponiyalik futbolchi uchun jiddiy taklif bergan. «Feyenoord» esa hujumchining jamoadan ketishi bo‘yicha taklifni ko‘rib chiqishga tayyor.

Voetbal International xabar berishicha, Uedaga qiziqish bir necha haftadan buyon saqlanib kelmoqda. Avvalroq hujumchiga «Brayton» va «Lids» klublari ham qiziqish bildirgan, ammo ularning hech biri futbolchi uchun rasmiy taklif bermagan.

«Fenerbaxche» esa Uedaga qiziqishni amaliy harakatga aylantirgan birinchi klub bo‘ldi. Istanbulliklar «Feyenoord»ga yapon hujumchisi bo‘yicha rasmiy taklif yuborgan.

Ueda o‘tgan mavsumda barcha musobaqalarda 40 ta uchrashuvda 26 ta gol va 2 ta golli uzatma qayd etdi. Transfermarkt portali futbolchining bozor qiymatini 20 million yevroga baholamoqda.