Бразилиянинг «Сан-Паулу» клуби Боливияга Жанубий Америка кубоги 1/8 финалида «Боливар»га қарши ўйин ўтказиш учун борганида ноодатий воқеа юз берди.

Боливия полицияси «Сан-Паулу» делегациясини ташиш учун ажратилган автобусни текшириш чоғида 86,5 кг марихуана аниқлади. Транспорт воситаси клубнинг ўзига эмас, «Сан-Паулу» Боливиядаги сафари учун ёллаган Buses Cosmos компаниясига тегишли бўлган.

Муҳими, «Сан-Паулу» футболчилари ушбу автобусга чиқмаган ва воқеага алоқадор шахслар билан мулоқотда бўлмаган. Гиёҳванд моддалар автобус жамоа делегациясини олиб кетишидан аввал аниқланган. Шундан сўнг ташувчи компания клубга бошқа автобус тақдим этган.

Ҳодиса юзасидан уч киши қўлга олинди ва Боливия ҳуқуқни муҳофаза қилувчи органлари тергов бошлади.

«Сан-Паулу» ва «Боливар» ўртасидаги Жанубий Америка кубоги 1/8 финалининг дастлабки учрашуви эса 1:1 ҳисобида якунланди.