"Манчестер Юнайтед"нинг собиқ ҳимоячиси Рио Фердинанд жамоа бош мураббийи Майкл Каррикни ёзги трансфер ойнасида Маркус Рэшфордни қўйиб юбормасликка чақирди.

28 ёшли вингер "Барселона"даги муваффақиятли ижарадан сўнг "Манчестер Юнайтед"га қайтди. Рэшфорд ўтган мавсум Каталония клуби сафида 49 та учрашув ўтказиб, 14 та гол урди ва 14 та голли узатмани амалга оширди.

"Рэшфорд "Манчестер Юнайтед"нинг машғулот базасига қайтди ва, йигитлар, у худди қизиб турган Ferrari каби. У ажойиб формада, у тайёр. Биласизми, яна нима? Унинг юзида табассум бор, ҳаракатларида эса енгиллик сезиляпти", — деди Фердинанд ўзининг YouTube каналида.

Фердинанднинг фикрича, Рэшфордни сақлаб қолиш "Манчестер Юнайтед" учун амалда янги футболчи харид қилиш билан баробар бўлиши мумкин.

"У қолишига умид қиламан. Шунда у клуб учун худди янги футболчидек бўлади. Балки энди биз кучли мотивацияга эга Маркус Рэшфордни кўрармиз. У майдонга чиқиб, барча шубҳа қилганлар ва танқидчиларга улар адашганини исботлар. Шундай бўлишига умид қиламан. Кўрамиз", — дея қўшимча қилди Фердинанд.

Рэшфорд Кэррик жамоасига қўшилиб улгурди ва "Манчестер Юнайтед" билан Дублиндаги мавсумолди йиғинларига йўл олди.

15 август куни манкунианликлар Польшада "Милан"га қарши ўртоқлик учрашувини ўтказади.