Diario Sport маълумотига кўра, «Барселона» яқин вақт ичида «Атлетико» ҳужумчиси Хулиан Альварес трансферидан воз кечишни режалаштирмаяпти.

Бош мураббий Ханс-Дитер Флик ва спорт директори Деку аргентиналик ҳужумчини тўлиқ қўллаб-қувватламоқда. Альвареснинг ўзи ҳам ҳар қандай йўл билан «Камп Ноу»га кўчиб ўтишни хоҳламоқда.

Ҳозирча музокараларда ижобий силжиш кузатилмаётган бўлса-да, каталонияликлар шошилмасликка қарор қилган ва яқин кунларда вазият ўзгаришига умид қилмоқда.

Аввалроқ Альварес «Атлетико»дан кетишга рухсат олиш мақсадида Диего Симеоне билан гаплашгани хабар қилинганди. Бироқ аргентиналик мураббий бу масалани клуб раҳбарияти ҳал қилиши кераклигини билдирган.

Шунингдек, «Атлетико» спорт директори Матеу Алемани Альваресга «Барселона»га ўтиш эшиги бутунлай ёпиқ эканини айтгани ҳақида ҳам хабарлар тарқалди.

Шунга қарамай, 26 ёшли ҳужумчи агентлари билан биргаликда клубдан кетиш йўлини излашда давом этмоқчи. Манбага кўра, унинг диққати энди «Атлетико»даги келажагига қаратилмаган.

Айни пайтда «Барселона» Мадрид клуби музокара столига ўтиришга рози бўлган тақдирда, Хулиан Альварес учун таклифини оширишга тайёр.