«Челси» бош мураббийи Хаби Алонсо шанба куни «Реал Сосьедад»га қарши ўтказилган ва 3:1 ҳисобидаги ғалаба билан якунланган ўртоқлик ўйинида мавсум олдидаги илк майдонга тушишини амалга оширган клуб сардори Рис Жеймс манзилига мақтов сўзларини айтди.

Жеймс Англия терма жамоаси сафида Жаҳон чемпионатида иштирок этиб (у ерда «уч шерлар» 3-ўринни эгаллаган эди) қайтгач, шу ҳафта бошидагина машғулотларга қўшилган эди. Шунга қарамай, Алонсо Премьер-лиганинг янги мавсуми олдидан ўз сардорига муҳим дақиқаларни тақдим этишга шошилди.

«Челси» сардори ушбу ғалабада муҳим роль ўйнади ва Жоао Педронинг биринчи голига ажойиб узатма етказиб берди. Шу тариқа, «кўклар» мавсум олди тайёргарлигини кўтаринки руҳда якунлашди.

«Характер, етакчилик, тажриба, маҳорат, тўп билан хотиржамлик ва тўпсиз курашувчанлик», — деди Алонсо.

«У ўз услуби ва турли позицияларда ўйнаши бўйича жуда мослашувчан, клуб афсонаси ва жамоанинг асосий ўйинчисидир».

Жеймс узоқ танаффусдан сўнг майдонга қайтган ягона футболчи эмас эди.

Янги харидлар Максенс Лакруа ва Морган Роджерс ҳам бир соат давомида ҳаракат қилишди, Роджерс эса «Стэмфорд Бридж»даги ўйинда ҳисобни очди.

Алонсо бор-йўғи уч кун машғулот ўтказганларига қарамай, сафга қайтган футболчиларнинг ўйинидан мамнун бўлди.

«Жами уч кунлик машғулотдан сўнг бунчалик яхши ўйнаш улар учун жуда ажойиб натижа», — деди «Челси» устози.

Испаниялик мутахассис «Челси» Премьер-лигадаги юришини бошлашидан олдин ҳали қилинадиган ишлар кўплигини билади, аммо шогирдларининг хоҳиш-истагидан мамнун.

«Ҳали дастлабки кунлар, жипслашиш, ривожланиш ва бирга шаклланиш учун вақт керак. Аммо энг муҳими — уларда ажойиб мавсум ўтказиш ва жамоада қолганларга ҳам юқадиган яхши муҳит яратиш учун чанқоқлик ва хоҳиш бор», — дея қўшимча қилди Алонсо.

Энди «Челси» Премьер-лиганинг 1-тури доирасида «Фулхэм»га қарши кечадиган очилиш ўйини олдидан бешта машғулот ўтказади ва Алонсо бор эътиборни жамоани тўлиқ тайёрлашга қаратади.

«Кўпчилик футболчилар машғулотларга тайёр. Мавсум олди тайёргарлигидан сўнг айримларнинг жисмоний ҳолати бошқалардан юқорироқ, аммо ҳаммаси яхши бўлади. Энди «Фулхэм»га қарши ўйин олдидан бешта машғулот ўтказишни режалаштирмоқдамиз ва асосий эътиборимиз шунга қаратилади».