"Марсель" Квинтен Тимбернинг эҳтимолий трансфери бўйича "Порту" билан музокара олиб бормоқда. Бу ҳақда Goal.com хабар берди.
Тимбернинг ўзи фаолиятини Англия чемпионатида давом эттиришни афзал кўради. Бироқ яқин вақт ичида Премьер-лига клубларидан унга таклиф тушиш-тушмаслиги ҳозирча номаълум.
"Марсель" Тимберни 2026 йил январь ойида "Фейеноорд"дан 4,5 миллион еврога сотиб олган эди. Шундан буён ярим ҳимоячи Франция клуби сафида 16 та ўйинда майдонга тушди, аммо гол ёки голли узатма билан ажралиб тура олмади. Унинг амалдаги шартномаси 2030 йил ёзига қадар мўлжалланган.
Бир ҳафта аввал "Порту" футболчи учун 15 миллиондан 18 миллион еврогача таклиф қилишга тайёр экани ҳақида маълумотлар тарқалган эди.
Тимбер мавсумолди тайёргарлигини муваффақиятли ўтказмоқда. У иккита ўртоқлик учрашувида битта гол урди ва битта голли узатмани амалга оширди.
Шунингдек, Тимбер яқинда бўлиб ўтган жаҳон чемпионатида Нидерландия терма жамоаси сафида иштирок этди.
