"Ювентус" собиқ ҳимоячиси Патрис Эвра туринликларнинг Чемпионлар лигаси финалида "Барселона"га қарши учраган мағлубиятини эслади.
2014 йилдан 2017 йилгача "Ювентус" сафида ўйнаган француз Luca (jftvluca) подкастида хотиралари билан ўртоқлашди. Суҳбатнинг асосий мавзуларидан бири 2015 йил Берлинда ўтказилган Чемпионлар лигаси финали бўлди.
"Мен ҳакамларни айблашни ёқтирмайман, аммо ўша туркиялик ҳакамни ёмон кўраман. Бундан бироз олдин у "Манчестер Юнайтед" — "Реал" ўйинида Нанини майдондан четлатганди — бу тарихдаги энг можароли қарорлардан бири эди. Финални ким бошқаришини айтишлари биланоқ, бизни талашларини дарҳол ҳис қилдим", — деди Эвра.
"Погбага нисбатан аниқ пенальти бор эди. Биз буюк "Барселона"га ютқаздик, аммо бу мутлақо аниқ пенальти эди. Умид қиламан, ўша ҳакам ҳозир қамоқда".
Ўша финалда "Барселона" "Ювентус"ни 3:1 ҳисобида мағлуб этган. Учрашувни бошқарган Жюнейт Чақир ҳозирда ФИФА ва УЕФАда ҳакамларни тайёрлаш бўйича инструктор ва мутахассис сифатида фаолият юритмоқда.
