Мадриднинг «Реал» клуби бош мураббийи Жозе Моуриньо «Барселона»нинг Испания чемпионатида «Бетис»га қарши ўтказган учрашувидаги баҳсли ҳакамлик қарорларига муносабат билдирди.

Каталонияликлар шанба куни Севильяда бўлиб ўтган баҳсда мезбонларни 5:2 ҳисобида мағлуб этишган эди.

Учрашув давомида ҳакамларнинг айрим қарорлари «Бетис» вакилларининг жиддий норозилигига сабаб бўлди.

Якшанба куни журналистлар «Реал» бош мураббийи Жозе Моуриньодан мазкур вазият ҳақидаги фикрини сўрашди.

«Мен бу ўйинни томоша қилмадим. Қасам ичаман, «Барселона»нинг учрашувини кўрганим йўқ. Ўша пайтда «Бавария» ва «РБ Лейпциг» ўртасидаги баҳсни кузатаётган эдим.

Кейинроқ «Бетис» ва «Барселона» ўйинида нималар содир бўлганини билиб олдим. Аммо, албатта, бундан умуман ҳайрон қолмадим.

Одатий иш куни, холос», — дея Моуриньонинг сўзларини келтиради Madrid Zone.

Қайд этиш жоиз, «Реал» якшанба куни Испания Ла Лигасида «Севилья»ни 4:1 ҳисобида мағлуб этди.

Навбатдаги турда эса Мадрид клубини принципиал рақиби «Барселона»га қарши муҳим учрашув кутмоқда.

25 октябрь куни бўлиб ўтадиган «Эль-класико»га «Камп Ноу» стадиони мезбонлик қилади.