Мадриднинг "Реал" клуби бош мураббийи Жозе Моуриньо "Севилья"га қарши учрашувда Арда Гюлер иштирокида юз берган баҳсли вазият ҳақида фикр билдирди.
Ла Лиганинг 9-турида мадридликлар 4:1 ҳисобида ғалаба қозонган баҳсда туркиялик ярим ҳимоячининг ҳаракати рақиб эътирозига сабаб бўлди.
"Севилья" вакилларининг таъкидлашича, Гюлер гол уришидан олдин Пекенинг юзига тирсаги билан зарба берган ва қизил карточка олиши керак эди. Бироқ ҳакам ВАРга мурожаат қилмаган, футболчига ҳатто сариқ карточка ҳам кўрсатмаган.
Моуриньо эса бу айбловларни тасдиқлайдиган далилларни кўришни талаб қилди.
"Гюлер тирсаги билан зарба бердими? Менга буни исботлайдиган ҳеч бўлмаганда битта суратни кўрсатинг.
Арданинг рақиби юзига зарба бергани аниқ кўринадиган бирорта тасвирни тақдим этинг. Мен далил сўрадим, аммо ҳозиргача ҳеч нарса кўрмадим.
Гюлер менга рақибига тирсаги билан урмаганини айтди.
Ла Лига доирасидаги навбатдаги матбуот анжумани шанба куни бўлиб ўтади. Агар ўша вақтгача кимдир зарба берилганини исботловчи аниқ видеотасвирни кўрсатса, бу қизил карточкага лойиқ ҳолат бўлганини тан оламан.
Бунда ҳеч қандай муаммо кўрмаяпман", — дея Моуриньонинг сўзларини келтиради Madrid Zone.
Эслатиб ўтамиз, "Реал" 21 октябрь куни Чемпионлар лигасида "РБ Лейпциг"ни қабул қилади.
25 октябрда эса мадридликлар сафарда "Барселона"га қарши "Эл-класико"да майдонга тушади.
