«Барселона» бош мураббийи Ҳанс-Дитер Флик жамоанинг ҳужум чизиғини янги футболчи билан кучайтириш режалари ҳақида фикр билдирди.
Якшанба куни «кўк-анорранглилар» Ла Лиганинг янги мавсумини «Эльче» устидан 5:0 ҳисобидаги йирик ғалаба билан бошлади. Ушбу баҳсда марказий ҳужумчи позициясида Рафинья Диас ҳаракат қилди. Бразилиялик футболчи иккита гол уриб, битта голли узатмани амалга оширди.
«Эртага янги ҳужумчи билан шартнома имзолаш масаласида Деку билан гаплашаман. Жамоамизнинг ўйинидан жуда мамнунмиз, аммо бу ҳафтада нималар содир бўлишини кўрамиз», — деди Флик матбуот анжуманида.
«Барселона» Испания чемпионатидаги навбатдаги учрашувини 27 август куни ўз майдонида Бильбаонинг «Атлетик» клубига қарши ўтказади. Баҳс Тошкент вақти билан 00:00 да бошланади.
