Диего Марадона 1986 йилги жаҳон чемпионатида Англия дарвозасига машҳур «Худонинг қўли» голини урган футбол тўпи аукционда 3,35 млн долларга сотилди. Бу ҳақда GOAL хабар берди.
Аргентина ва Англия ўртасидаги чорак финал учрашувида (2:1) ишлатилган тўп 22 август куни Heritage Auctions савдосига қўйилган. Аукциондаги бошланғич нарх 2,5 млн долларни ташкил этган.
Айнан шу тўп билан Марадона учрашувда ҳисобни қўли билан киритилган машҳур гол орқали очган. Орадан тўрт дақиқа ўтиб аргентиналик афсона бир нечта рақибни ортда қолдириб, футбол тарихидаги энг машҳур голлардан яна бирини урган.
Лот дастлаб 10 млн долларгача баҳоланган эди. Бироқ якуний нарх Марадонанинг ўша учрашувда кийган футболкаси рекордига ета олмади. Ушбу либос 2022 йилда қарийб 9,3 млн долларга сотилган.
Мазкур тўп 2022 йилда ҳам аукционга чиқарилиб, 2,37 млн долларга сотилган эди. 2023 йилги навбатдаги савдода эса 2,04 млн долларлик таклиф белгиланган минимал нархга етмагани сабабли битим амалга ошмаган.
