«Бавария» машғулотларида Венсан Компани махфийликни сақлашга қанчалик ҳаракат қилмасин, янги футболчи — уругвайлик Родриго Дудок кўзга ташланди. Қизиғи, клуб эҳтимолий трансфер ҳақида ҳеч қандай расмий маълумот бермаган, бу эса журналистларда табиий саволлар уйғотди.

Маълум бўлишича, Дудок Мюнхенга «Бавария» ва АҚШнинг «Лос-Анжелес» клуби 2023 йилда биргаликда йўлга қўйган дастур доирасида келган. Ушбу лойиҳанинг асосий мақсади — дунё бўйлаб иқтидорли футболчиларни излаб топиш.

derbyderbyderby.it хабарига кўра, уругвайлик футболчи мазкур дастур қандай ишлашининг яққол мисоли ҳисобланади. Агар Дудок мураббийлар штабида яхши таассурот қолдирса, унга «Бавария»нинг иккинчи жамоасида ўйнаш имконияти берилиши мумкин. Акс ҳолда, у Монтевидеога қайтиб кетади.