«Лион» собиқ ҳужумчиси Карим Бензема Франция клубига қайтиб, ҳатто маошсиз ўйнашга ҳам тайёр бўлган. Бу ҳақда L'Equipe хабар бермоқда.

Манба маълумотига кўра, 38 ёшли футболчи «Лион»га бўлган ҳурмати ва туғилиб ўсган шаҳрига меҳри туфайли шундай қадам ташлашга тайёр эди. Клуб раҳбарияти ҳам шу ёзда Бенземани қайтариш имкониятини кўриб чиққан, бироқ ўша пайтда у «Ал-Ҳилол» билан шартнома асосида боғланган эди.

31 август куни франциялик футболчи Саудия Арабистони клуби билан шартномасини бекор қилди. Шунга қарамай, Бензема 2030 йилга қадар Саудия Арабистони чемпионати элчиси бўлиб қолади. Унинг имиж шартномасидаги айрим бандлар ҳужумчининг бошқа мамлакатда фаолиятини давом эттиришига тўсқинлик қилиши мумкин.

Хабар қилинишича, Бензема вакиллари Саудия Арабистони Давлат инвестиция жамғармаси — PIF билан Лига 1да ўйнаш учун истисно қўллаш масаласида музокара олиб борган, аммо томонлар ўртасидаги мулоқот деярли боши берк кўчага кириб қолган.

L'Equipe маълумотига кўра, шу вазият фонида Бенземанинг футболчилик фаолиятини якунлаш эҳтимоли тобора ошиб бормоқда. Франциялик ҳужумчи 2026/27 йилги мавсумга дастлаб фаолиятидаги сўнгги мавсум сифатида тайёргарлик кўрган.

Бензема «Лион» тарбияланувчиси ҳисобланади. У клубнинг асосий жамоасида 2005 йилдан 2009 йилгача тўп тепган ва шундан сўнг «Реал»га кўчиб ўтган.