Англия Премьер Лигасининг 3-туридан ўрин олган “Манчестер Сити” ва “Ковентри” (1:0) учрашувининг илк дақиқаларида ўзбекистонлик футболчи Абдуқодир Ҳусанов иштирокида хавфли вазият юзага келди. Ўйиндан сўнг “шаҳарликлар” устози Энцо Мареска ўзбекистонлик ҳимоячининг ўша вазиятдаги ҳаракатига ўз муносабатини билдирди.

Учрашувнинг 6-дақиқасида Ҳусанов ўз жарима майдончаси ичида тўпни дарвозабон Жанлуижи Доннаруммага оширишга қарор қилди. Бироқ италиялик посбон тўпни қабул қилишда қўпол хатога йўл қўйди ва тўп унинг оёғи остидан сирғалиб, дарвоза томон думалади. Сўнгги сонияларда Доннарумма вазиятни ўнглаб, дарвоза чизиғини кесиб ўтаётган тўпни қайтариб қолишга муваффақ бўлди. Акс ҳолда, ушбу вазият якунда автогол билан тугаши мумкин эди.

Гарчи тўпни тўхтатишда Доннарумма хатога йўл қўйган бўлса-да, жамоа бош мураббийи Энцо Мареска бу борада айнан Ҳусановнинг қабул қилган қарор хато эканлигини айтди:

“Бу ахир Доннарумма! Унинг қанчалик кучли дарвозабон эканини ҳаммамиз яхши биламиз. Аммо ўйлашимча, ўша ҳолатда Абдуқодирнинг тўпни айнан дарвозабонга узатиши яхши қарор эмас эди. Шунга қарамай, Жанжуижи охирги сонияларда тўпни қайтаришни уддалади. Биз якуний натижадан мамнунмиз”, деди мутахассис.

Маълумот учун, ушбу ғалабадан сўнг “Манчестер Сити” 9 очко билан турнир жадвалида 1-ўринни эгаллаб турибди.