Чемпионлар лигаси умумий босқичининг 1-турида "Порту" ва "Манчестер Сити" ўртасидаги учрашув якунида футболчилар ўртасида тортишув юзага келди.
90+3-дақиқада "Порту" ярим ҳимоячиси Пабло Росарио Эрлинг Холанд билан тўқнашиб кетди. Икки футболчи ўртасидаги вазият кескинлашгач, майдондаги бошқа ўйинчилар ҳам улар атрофига тўпланди. Ҳакам якунда Росарио ва Холанднинг ҳар иккисини сариқ карточка билан огоҳлантирди.
Шу пайт "Манчестер Сити" ҳимоячиси Абдуқодир Ҳусанов ҳам тезда воқеа жойига етиб келиб, Холандни жанжалдан ажратиб олди ва вазиятнинг янада кескинлашишига йўл қўймади.
Ҳусанов ушбу баҳсда 48-дақиқада Йошко Гвардиол ўрнига захирадан майдонга тушган эди. "Манчестер Сити" эса Холанднинг дубли эвазига "Порту"ни 2:0 ҳисобида мағлуб этди.
