Туркиянинг “Тургутлуспор” клуби эркаклар жамоасини эндиликда 22 ёшли Зейнеп Местан бошқаради. Бу ҳақда клуб матбуот хизмати хабар бермоқда.

Томонлар расмий шартнома имзолаган бўлиб, унинг молиявий тафсилотлари сир тутилмоқда. Қайд этилишича, ёш мутахассис жамоани янги мавсумга тайёрлаш вазифасини ўз зиммасига олган. Ушбу тайинлов орқали Местан “Тургутлуспор” тарихида эркаклар жамоасига устозлик қиладиган илк аёл мураббийга айланди.

Клуб президенти Йилмаз Генчтуркнинг айтишича, бу шунчаки PR ёки тасодиф эмас. Зейнеп музокаралар вақтида шундай кучли лойиҳалар тақдим этганки, раҳбарият унга дарҳол расмий шартнома таклиф қилган. Зейнеп Местаннинг таъкидлашича, у жамоага ҳужумкор футбол фалсафасини сингдирмоқчи ва келгуси 5 йил ичида клубни Туркия Биринчи лигасига олиб чиқишни мақсад қилган.

Маълумот ўрнида, “Тургутлуспор” ўтган мавсумда Туркиянинг бешинчи дивизионида иштирок этиб, турнир жадвалида 10-ўринни банд этган эди. Янги мавсум эса жамоа мамлакатнинг олтинчи лигасида иштирок этади.

Эслатиб ўтамиз, жорий йилнинг апрель ойида Германиянинг “Юнион Берлин” клуби ҳам Бундеслига тарихида илк бор аёл кишини бош мураббий этиб тайинлаган эди. Ўшанда ушбу масъулиятли постни 34 ёшли Мария-Луиза Эта эгаллаганди.