Turkiyaning “Turgutluspor” klubi erkaklar jamoasini endilikda 22 yoshli Zeynep Mestan boshqaradi. Bu haqda klub matbuot xizmati xabar bermoqda.

Tomonlar rasmiy shartnoma imzolagan bo‘lib, uning moliyaviy tafsilotlari sir tutilmoqda. Qayd etilishicha, yosh mutaxassis jamoani yangi mavsumga tayyorlash vazifasini o‘z zimmasiga olgan. Ushbu tayinlov orqali Mestan “Turgutluspor” tarixida erkaklar jamoasiga ustozlik qiladigan ilk ayol murabbiyga aylandi.

Klub prezidenti Yilmaz Genchturkning aytishicha, bu shunchaki PR yoki tasodif emas. Zeynep muzokaralar vaqtida shunday kuchli loyihalar taqdim etganki, rahbariyat unga darhol rasmiy shartnoma taklif qilgan. Zeynep Mestanning ta’kidlashicha, u jamoaga hujumkor futbol falsafasini singdirmoqchi va kelgusi 5 yil ichida klubni Turkiya Birinchi ligasiga olib chiqishni maqsad qilgan.

Ma’lumot o‘rnida, “Turgutluspor” o‘tgan mavsumda Turkiyaning beshinchi divizionida ishtirok etib, turnir jadvalida 10-o‘rinni band etgan edi. Yangi mavsum esa jamoa mamlakatning oltinchi ligasida ishtirok etadi.

Eslatib o‘tamiz, joriy yilning aprel oyida Germaniyaning “Yunion Berlin” klubi ham Bundesliga tarixida ilk bor ayol kishini bosh murabbiy etib tayinlagan edi. O‘shanda ushbu mas’uliyatli postni 34 yoshli Mariya-Luiza Eta egallagandi.