Kataloniyaning «Barselona» klubi «Manchester Siti» bilan ikki yulduz futbolchini transfer qilish masalasida muzokaralarga kirishdi. Bu haqda indykaila News xabar bermoqda.
Manbaga ko‘ra, «ko‘k-anorranglilar» Angliyaning top-klubiga norvegiyalik markaziy hujumchi Erling Holand va belgiyalik vinger Jeremi Dokuning transferi bo‘yicha muzokara o‘tkazishga tayyor ekanini ma’lum qilgan.
Ispaniya chempioni ushbu shov-shuvli kelishuvni kelasi yilning yozida amalga oshirishni rejalashtirmoqda.
Transfermarkt portali Erling Holandning bozor qiymatini 220 million yevro deb baholamoqda. 26 yoshli norvegiyalik futbolchining «Manchester Siti» bilan shartnomasi 2034 yil iyun oyining oxirigacha amal qiladi.
Jeremi Doku esa Manchester klubi bilan 2031 yilning o‘rtalarigacha shartnoma imzolagan. Uning bozor qiymati 75 million yevroni tashkil etadi.
