«Барселона» спорт директори Деку тиззасидан олган жароҳатидан тикланишда давом этаётган Френки де Йонгнинг ҳолати ҳақида фикр билдирди.
Декунинг айтишича, клуб футболчиларнинг саломатлиги билан боғлиқ тафсилотларни оммага ошкор қилиш ниятида эмас. Унинг таъкидлашича, тиббий маълумотлар футболчининг шахсий ҳаётига тааллуқли, шунинг учун бу масалани оммавий ахборот воситалари вакиллари билан муҳокама қилишни тўғри деб ҳисобламайди.
«Родрини эҳтимолий тарзда жамоага олиб келиш ҳақидаги қарор Де Йонгнинг жароҳати билан мутлақо боғлиқ эмас», — дея Декунинг сўзларини RAC1 келтиради.
Де Йонг ҳозирда тизза боғламидан олган жароҳатидан тикланмоқда. Ўтган мавсумда ярим ҳимоячи «Барселона» сафида Испания чемпионатининг 25 та учрашувида иштирок этиб, 1 та гол урди ва 5 та голли узатма амалга оширди.
