"Эвертон" мухлислар учун ўзига хос ва ноодатий таклиф тайёрлади. Унга кўра, исталган ишқибоз 25 минг фунт стерлинг эвазига бир кун давомида жамоа футболчиларининг кундалик ҳаётига яқин муҳитда бўлиши мумкин.
Пакет доирасида мухлис жамоанинг расмий меҳмонхонасида қолади, футболчилар билан бирга овқатланади ва жамоа билан сафар қилади. Шунингдек, жума куни футболчилар билан машғулот ўтказиш имконияти ҳам тақдим этилади.
Таклифга мураббийлар штаби брифинглари ва жамоавий суҳбатларда иштирок этиш, ўйин олдидан майдондаги чигалёзди машқларини кузатиш ҳам киритилган.
Энг қизиқарли жиҳати — мухлис ўйин куни жамоанинг фахрий аъзоси сифатида захира ўриндиғида ўтириши мумкин бўлади.
Бундан ташқари, пакет харидори ўз исми туширилган шахсийлаштирилган расмий формага ҳам эга бўлади.
Шу тариқа, 25 минг фунт тўлашга тайёр бўлган "Эвертон" ишқибози бир кунга бўлса-да ўзини Премьер-лига футболчиси каби ҳис қилиш имкониятини қўлга киритади.
