«Челси» клуб эгалари таркибидаги ўзгаришларни расман эълон қилди.
Клуб ҳамэгалари Тодд Боули ва Марк Уолтер ўз улушларини аввалдан «Челси» акцияларининг 60 фоиздан зиёдига эгалик қилиб келган Clearlake компаниясига сотди.
Шу тариқа, Clearlake асосчилари Беҳдод Эгбали ва Хосе Фелисиано клуб устидан тўлиқ назоратни қўлга киритди.
Тодд Боули, шунингдек, «Челси» бошқарув кенгаши раиси лавозимини тарк этади. Клубнинг кундалик фаолияти, раҳбарият таркиби ва стратегик йўналишида эса ўзгариш бўлмаслиги таъкидланди.
«Clearlake танланган стратегик йўналишни давом эттириш ва мулкдорлар гуруҳи белгилаб берган мақсадларни амалга ошириш ниятида», — дейилади клуб баёнотида.
Боули ва Уолтер 2022 йилда «Челси»ни Роман Абрамовичдан 2,5 миллиард фунт стерлингга сотиб олган инвесторлар гуруҳи таркибига кирган эди.
Кейинчалик ҳар икки бизнесмен ва Clearlake ўртасида клубни ривожлантириш стратегияси борасида бир неча бор келишмовчиликлар юзага келган.
