«Реал» президенти Флорентино Перес жума куни Сеутага расмий ташриф буюради. Бу ҳақда Marca OK Diario маълумотига таяниб хабар берди.
Пересга клубнинг жамоатчилик билан алоқалар бўйича директори Эмилио Бутрагеньо ҳамда «Реал»нинг фахрий президенти, Сеутада туғилган Хосе Мартинес Пирри ҳамроҳлик қилади.
Ташриф давомида «Реал» раҳбари Сеута автоном шаҳри президенти Хуан Хесус Вивас билан учрашиши режалаштирилган. Перес клубнинг шаҳар билан ҳамжиҳатлигини шахсан билдириб, уни қўллаб-қувватлашини маълум қилмоқчи.
Эслатиб ўтамиз, 30 июль куни Марокашдан 70 мингдан ортиқ мигрант Испаниянинг Сеута яримэксклави ҳудудига киришга уринган. Уларнинг катта қисми шаҳарда қолган, чегарани кесиб ўтишга уринишлар вақтида ўнлаб одам ҳалок бўлган.
Ла Лиганинг 6-турида «Эльче»га қарши ўйин олдидан футболчилар майдонга Todos somos Caballas ёзуви туширилган оқ футболкаларда чиқишган. Ушбу ибора маҳаллий маънода «Барчамиз — Сеута аҳолисимиз» деган мазмунни англатади. Caballas сўзи Сеута аҳолисига нисбатан қўлланадиган халқона лақаб ҳисобланади.
Килиан Мбаппе, Ибраима Конате ва Винисиус Жуниор футболкаларни тўлиқ киймагани сабабли ундаги ёзув деярли кўринмаган. Кейинроқ Винисиус Мбаппега футболкани Сеутани қўллаб-қувватловчи ёзув кўринмайдиган тарзда қандай кийишни кўрсатаётган видео ҳам тарқалган.
Marca маълумотига кўра, «Реал»да ушбу ҳолат қандай талқин қилингани ва клубнинг Сеутага муносабати борасида шубҳалар пайдо бўлганидан хавотир билдирилган.
Шу сабаб делегациянинг ташрифи «Реал»нинг Сеутани расман қўллаб-қувватлашини намойиш этишга қаратилган.
