Алексис Макаллистернинг отаси Карлос футболчининг "Ливерпуль"дан кетиши мумкинлиги ҳақидаги миш-мишларга муносабат билдирди.
Унинг таъкидлашича, мерсисайдликлар ҳозирча янги шартнома бўйича музокара бошламаган, аммо бу футболчининг клубни тарк этишини англатмайди.
"Ливерпуль" раҳбариятидан ҳеч ким шартномани узайтириш масаласида биз билан боғланмади. Амалдаги келишувимиз бор ва биз унга ҳамда "Ливерпуль"га содиқмиз. Агар клуб янги шартнома таклиф қилмаса, бу уларнинг ҳаққи", — деди Карлос Макаллистер 365 Scores нашрига.
Бу баёнот Алексиснинг ўтган ҳафта янги шартнома таклиф қилинмаганидан "жуда ва жуда хафа" эканини айтганидан кейин янгради. 2023 йилда клубга келган Доминик Собослаи ва Райан Гравенберх билан эса янги келишувлар бўйича ишлар олиб борилган.
Карлос Макаллистер ўғлининг "Реал"га ўтиши мумкинлиги ҳақидаги хабарларни ҳам рад этди.
"Реал"дан Алексиснинг бутун фаолияти давомида ҳеч ким биз билан бирор марта ҳам боғланмаган", — деди у.
Макаллистернинг "Ливерпуль" билан амалдаги шартномаси 2028 йилгача мўлжалланган.
Аргентиналик ярим ҳимоячи сўнгги икки асосий таркибдаги ўйинида 2 та гол урди ва якшанба куни "Борнмут"га қарши учрашувда ҳам майдонга тушиши кутилмоқда.
