Мадриднинг «Реал» клуби ҳужумчиси Килиан Мбаппе ўз манзилига билдирилаётган танқидлар ҳақида фикр билдирди.

Франциялик футболчи баъзан «фақат гол ура олади», аммо жамоавий ўйинда етарлича фойдали эмас, деган танқидларга учраб туради.

«Одамлар мен фақат гол ураман, дейишяптими? Бу уларнинг фикри. Футболда ўтказган йилларим давомида ҳар кимнинг ўз қараши борлигини қабул қилишни ўргандим. Баъзан одамлар сенинг фикрингга қўшилади, баъзан эса йўқ.

Футболда муваффақиятга олиб борадиган битта тўғри йўл йўқ — ғалаба қозонишнинг миллионлаб усуллари бор. Шунинг учун мен ҳар доим турли нуқтаи назарларни эшитишга тайёрман.

Айрим одамлар шунчаки шов-шув кўтаришни ёки зарар етказишни истайди. Аммо мен футболнинг моҳиятини тушунадиган одамлар билан ўйин ҳақида гаплашишга доим очиқман. Бу футболга бошқа томондан қараш ва янги нарсаларни ўрганишга ёрдам бериши мумкин», — дея Мбаппенинг сўзларини Madrid Universal келтирди.

Жорий мавсумда 27 ёшли ҳужумчи «Реал» сафида 7 та ўйинда 8 та гол урди ва 2 та голли узатмани амалга оширди.