Madridning «Real» klubi hujumchisi Kilian Mbappe o‘z manziliga bildirilayotgan tanqidlar haqida fikr bildirdi.

Fransiyalik futbolchi ba’zan «faqat gol ura oladi», ammo jamoaviy o‘yinda yetarlicha foydali emas, degan tanqidlarga uchrab turadi.

«Odamlar men faqat gol uraman, deyishyaptimi? Bu ularning fikri. Futbolda o‘tkazgan yillarim davomida har kimning o‘z qarashi borligini qabul qilishni o‘rgandim. Ba’zan odamlar sening fikringga qo‘shiladi, ba’zan esa yo‘q.

Futbolda muvaffaqiyatga olib boradigan bitta to‘g‘ri yo‘l yo‘q — g‘alaba qozonishning millionlab usullari bor. Shuning uchun men har doim turli nuqtai nazarlarni eshitishga tayyorman.

Ayrim odamlar shunchaki shov-shuv ko‘tarishni yoki zarar yetkazishni istaydi. Ammo men futbolning mohiyatini tushunadigan odamlar bilan o‘yin haqida gaplashishga doim ochiqman. Bu futbolga boshqa tomondan qarash va yangi narsalarni o‘rganishga yordam berishi mumkin», — deya Mbappening so‘zlarini Madrid Universal keltirdi.

Joriy mavsumda 27 yoshli hujumchi «Real» safida 7 ta o‘yinda 8 ta gol urdi va 2 ta golli uzatmani amalga oshirdi.