Ўтган мавсумда ҳужумчи Маркус Рэшфорд «Барселона» сафида ижара асосида тўп сурди. Англиялик футболчи каталонияликлар таркибида 49 та ўйинда 14 та гол урди ва 15 та голли узатмани амалга оширди.

Гол ва ассистлар бўйича икки хонали кўрсаткич, шунингдек, 30 миллион евро миқдоридаги нисбатан қулай харид нархи «Барселона» Рэшфордни жамоада олиб қолиши мумкинлиги ҳақидаги фикрларни кучайтирган эди. El Nacional нашрининг шанба куни чоп этилган материалида ҳам шу ҳақда сўз боради.

Бироқ каталонияликлар бошқача қарор қабул қилди ва Рэшфорд «Барселона»да қолишни хоҳлаганига қарамай, «Манчестер Юнайтед»га қайтишга мажбур бўлди.

Муаллифлар The Sun нашрига таяниб, Рэшфорд бош мураббий Ханс-Дитер Фликдан жамоада қолишига рухсат беришини илтимос қилганини таъкидламоқда. Ҳужумчининг немис мутахассиси билан муносабатлари яхши бўлган, аммо бу ҳам вазиятни ўзгартира олмаган.

Флик ва Деку масалани муҳокама қилиб, «Барселона» учун Рэшфорддан воз кечиш маъқул деган қарорга келган. Бунда футболчининг юқори маоши ва ёши ҳам инобатга олинган.

Яна бир муҳим омил шу бўлганки, «Барселона» ҳужум чизиғига бошқа футболчини олиб келиш бўйича деярли келишувга эришган эди. Гап Энтони Гордон ҳақида кетмоқда.

«Бу Декунинг шахсий танлови эди. У Рэшфордни сақлаб қолишга қараганда, гарчи қимматроқ бўлса-да, ушбу трансфер анча қизиқарли вариант эканига ишонган», — дейилади материалда.

Манба Декунинг танлови ҳозирча ўзини оқлаётганини ҳам таъкидлайди. Энтони Гордон «Барселона» сафида ҳали гол ургани йўқ, аммо олтита ўйинда бешта голли узатмани амалга оширган.