"Интер Майами" ҳужумчиси Лионель Месси МЛС мунтазам чемпионати доирасида "Сан-Диего"га қарши ўтган учрашувда жарима зарбасидан гол урди. Баҳс 2:2 ҳисобида якунланди.

39 ёшли аргентиналик ҳужумчи учун бу жарима зарбасидан урилган 75-гол бўлди. Бу кўрсаткич бўйича Месси португалиялик тўпурар Криштиану Роналдудан 10 та голга олдинда бормоқда. "Ал-Наср"нинг 41 ёшли ҳужумчиси фаолияти давомида жарима зарбаларидан 65 та гол урган.

Лионель Месси ушбу кўрсаткич бўйича футбол тарихида иккинчи ўринни эгаллаб турибди. Аргентиналик футболчидан кўпроқ гол урган ягона ўйинчи — Марселиньо Кариока. Унинг ҳисобида жарима зарбаларидан урилган 78 та гол бор.