Жозе Моуринью сўнгги йилларда ҳаддан ташқари ҳимоявий футбол учун кўп танқид қилинди. Португалиялик мутахассиснинг ўйин услубини ҳатто «автобус» деб ҳам аташган. Бироқ Моуриньюнинг ўзи бир неча бор ўйин услуби ихтиёрдаги футболчиларнинг имкониятларига қараб шаклланишини таъкидлаган.

Шундай танқидлар фонида айримлар айнан Жозе Моуринью бошқарувидаги «Реал» Ла Лига тарихидаги энг сермаҳсул мавсумни ўтказганини унутиб қўйган бўлиши мумкин.

Гап 2011/12 йилги мавсум ҳақида кетмоқда. Ўшанда «Реал» Моуринью бошчилигида 100 очко жамғариб, 121 та гол урган. Ла Лигадаги ушбу сермаҳсуллик рекорди ҳанузгача сақланиб турибди.

Криштиану Роналду, Гонсало Игуаин, Карим Бензема, Месут Ўзил, Анхель Ди Мария ва Кака каби футболчилар тўп тепган «Реал» 38 та ўйинда 121 та гол урган. Бу ҳар бир учрашувга ўртача 3,18 тадан гол дегани.

Энди эса 15 йилдан кейин Моуриньюнинг ўша «Реал»и ўрнатган рекорд янгиланиши мумкин.

Ханс-Дитер Флик бошқараётган «Барселона» чемпионатни жуда кучли бошлади ва дастлабки 7 турда 31 та гол урди. «Кўк-анорранглилар» ҳар бир учрашувда ўртача 4,43 тадан гол урмоқда.

Бу эса «Барселона»нинг Ла Лига тарихида янги сермаҳсуллик рекордини ўрнатиш учун жиддий даъвогар эканини кўрсатмоқда.