"Ювентус" собиқ ярим ҳимоячиси Клаудио Маркизионинг ўғли Давиде Маркизио "Юве" билан илк профессионал шартномасини имзолади. Бу ҳақда инсайдер Николо Скира хабар берди.
Давиде 17 ёшда. У ҳам отаси сингари марказий ярим ҳимоячи позициясида тўп тепади. Футболчи "Ювентус"нинг U-18 жамоаси сафида тўртта учрашув ўтказиб, битта гол урди ва иккита голли узатмани амалга оширди.
Клаудио Маркизио 2006 йилдан 2018 йилга қадар "Ювентус" шарафини ҳимоя қилган. Фақат 2006/2007 йилги мавсумда у "Эмполи"да ижара асосида ўйнаган.
Маркизио "Ювентус" билан етти марта Италия чемпиони бўлган, тўрт марта мамлакат кубоги ва икки марта Италия Суперкубогини қўлга киритган. Шунингдек, у жамоа билан икки бор Чемпионлар лигаси финалига қадар етиб борган.
