El Confidencial нашри маълумотига кўра, "Атлетико Мадрид"нинг футбол бўйича бош директори Карлос Бусеро ёзда Хулиан Альвареснинг "Барселона"га сотилишига кўмаклашишга уринган. У бу масалада Каталония клуби спорт директори Деку билан норасмий музокаралар ҳам ўтказган.
Хабар қилинишича, Бусеро мустақил равишда ҳаракат қилган ва бу "Атлетико" раҳбариятида жиддий норозилик уйғотган. Клуб раҳбарлари эса Альвареснинг кетишига тўсқинлик қилган.
Бу ҳолат "Атлетико" раҳбарияти ичида катта келишмовчиликка ҳам сабаб бўлган. Бусеронинг клубнинг яна бир директори Матеу Алемани билан муносабатлари таранг экани айтилмоқда. Манбага кўра, у Мадрид клубидаги таъсирини қайта ошириш мақсадида Альвареснинг сотилиши имкониятини ўрганган.
Бусеро "Атлетико" ва "Барселона" ўртасида воситачи сифатида ҳаракат қилиб, Альварес трансфери бўйича келишувга эришишга уринган. Бироқ "матрасчилар" бошиданоқ аргентиналик ҳужумчини жамоада сақлаб қолиш ниятида қатъий турган.
26 ёшли Альварес эса узоқ давом этган ёзги трансфер можаросидан сўнг яна жамоа таркибига қайтарилди ва ҳозир мухлислар билан муносабатларини яхшилашга ҳаракат қилмоқда.
"Барселона" эса Альваресга бўлган қизиқишидан воз кечмаган. Хабарларга кўра, Каталония клуби келгуси трансфер ойнасида уни қўлга киритиш учун яна ҳаракат қилиши мумкин.
