El Confidencial nashri ma’lumotiga ko‘ra, "Atletiko Madrid"ning futbol bo‘yicha bosh direktori Karlos Busero yozda Xulian Alvaresning "Barselona"ga sotilishiga ko‘maklashishga uringan. U bu masalada Kataloniya klubi sport direktori Deku bilan norasmiy muzokaralar ham o‘tkazgan.

Xabar qilinishicha, Busero mustaqil ravishda harakat qilgan va bu "Atletiko" rahbariyatida jiddiy norozilik uyg‘otgan. Klub rahbarlari esa Alvaresning ketishiga to‘sqinlik qilgan.

Bu holat "Atletiko" rahbariyati ichida katta kelishmovchilikka ham sabab bo‘lgan. Buseroning klubning yana bir direktori Mateu Alemani bilan munosabatlari tarang ekani aytilmoqda. Manbaga ko‘ra, u Madrid klubidagi ta’sirini qayta oshirish maqsadida Alvaresning sotilishi imkoniyatini o‘rgangan.

Busero "Atletiko" va "Barselona" o‘rtasida vositachi sifatida harakat qilib, Alvares transferi bo‘yicha kelishuvga erishishga uringan. Biroq "matraschilar" boshidanoq argentinalik hujumchini jamoada saqlab qolish niyatida qat’iy turgan.

26 yoshli Alvares esa uzoq davom etgan yozgi transfer mojarosidan so‘ng yana jamoa tarkibiga qaytarildi va hozir muxlislar bilan munosabatlarini yaxshilashga harakat qilmoqda.

"Barselona" esa Alvaresga bo‘lgan qiziqishidan voz kechmagan. Xabarlarga ko‘ra, Kataloniya klubi kelgusi transfer oynasida uni qo‘lga kiritish uchun yana harakat qilishi mumkin.