Англия Футбол ассоциацияси (FA) «Челси» клубига «Фулхэм»га қарши учрашувда мухлисларнинг камситувчи шиорлари янграгани бўйича айблов қўйди. 24 август куни бўлиб ўтган баҳсда «Челси» 3:2 ҳисобида ғалаба қозонган эди.
FA маълумотига кўра, учрашувнинг 9-дақиқасида мухлислар томонидан дин ёки эътиқодга ишора қилувчи ҳақоратомуз ва камситувчи шиорлар айтилган. Шу сабаб клуб томошабинлар хатти-ҳаракатини назорат қила олмаганликда айбланмоқда.
«Челси» эса ўйиндан кейинёқ бундай хатти-ҳаракатларни қоралаган. Клуб айбдор деб топилган мухлисларга стадионга киришни муддатсиз тақиқлаш каби чоралар қўлланиши мумкинлигини билдирган.
