Angliya Futbol assosiasiyasi (FA) «Chelsi» klubiga «Fulxem»ga qarshi uchrashuvda muxlislarning kamsituvchi shiorlari yangragani bo‘yicha ayblov qo‘ydi. 24 avgust kuni bo‘lib o‘tgan bahsda «Chelsi» 3:2 hisobida g‘alaba qozongan edi.

FA ma’lumotiga ko‘ra, uchrashuvning 9-daqiqasida muxlislar tomonidan din yoki e’tiqodga ishora qiluvchi haqoratomuz va kamsituvchi shiorlar aytilgan. Shu sabab klub tomoshabinlar xatti-harakatini nazorat qila olmaganlikda ayblanmoqda.

«Chelsi» esa o‘yindan keyinyoq bunday xatti-harakatlarni qoralagan. Klub aybdor deb topilgan muxlislarga stadionga kirishni muddatsiz taqiqlash kabi choralar qo‘llanishi mumkinligini bildirgan.