«Реал» бош мураббийи Жозе Моуриньо футболчилар билан ишлаш услуби ва қарор қабул қилиш жараёни ҳақида гапирди.

«Мен доимо футболчилар билан яхши мулоқот қилишга ҳаракат қиламан. Кўпинча уларга: «Бу — ушбу ўйин учун менинг ғоям, бу — стратегиям, ёрдамчиларим билан бирга ўйинни шундай таҳлил қилдик ва мана бундай ўйнамоқчимиз», деб тушунтираман.

Аммо бундан ҳам муҳими — футболчиларнинг ўзлари нима ҳис қилаётгани. Улардан: «Буни бажара оласанми? Сенга қўйилган вазифаларни уддалай оласанми? Агар йўқ бўлса, ўз фикрингни айт», деб сўрайман.

Шунинг учун биз доимо ечимни биргаликда излаймиз. Мураббий ҳам, футболчи ҳам ўзини ишончли ва қулай ҳис қиладиган энг яхши вариантни топишга ҳаракат қиламиз.

Футболчи ўзи ишонмайдиган ишни бажараётган бўлса, бу самара бермайди, деб ўйлайман. Шу сабаб мураббий билан унинг ғояларини майдонда амалга оширадиган футболчилар ўртасидаги муносабат жуда муҳим.

Университетдаги устозларимдан бири шундай дерди: «Сиз футболчиларни эмас, инсонларни тарбиялайсиз».

Ҳа, улар футболчилар. Аммо биринчи навбатда улар инсонлар, бу ҳолатда эса ёш инсонлар. Шунинг учун иш жараёнида инсоний муносабат жуда катта аҳамиятга эга», — деди Моуринью.