«Арсенал» ва Норвегия терма жамоаси ярим ҳимоячиси Мартин Эдегор тўпиғидан олган жароҳати сабаб сешанба куниги машғулотни ўтказиб юборди. EPL Index хабарига кўра, унинг миллий жамоанинг яқин ўйинларида иштирок этиши ҳозирча сўроқ остида.
Эдегор Португалияга қарши учрашув якунида Бернарду Силва билан тўқнашувдан кейин жароҳат олган. Ўйиндан сўнг норвегиялик футболчи стадионни оқсаб тарк этган.
Норвегия терма жамоаси бош мураббийи Столе Сольбаккен миллий жамоа ва «Арсенал» тиббий штаблари футболчининг ҳолати бўйича доимий равишда маълумот алмашиб турганини билдирди.
Сешанба куни Эдегорнинг аҳволи бироз яхшиланган. Бош мураббий ёрдамчиси Бреде Хангеланннинг айтишича, футболчининг тўпиғидаги оғриқ аввалги кунга нисбатан анча камайган.
Норвегия терма жамоаси пайшанба куни Уэльсга қарши майдонга тушади, якшанба куни эса Португалия билан баҳс олиб боради.
