«Arsenal» va Norvegiya terma jamoasi yarim himoyachisi Martin Edegor to‘pig‘idan olgan jarohati sabab seshanba kunigi mashg‘ulotni o‘tkazib yubordi. EPL Index xabariga ko‘ra, uning milliy jamoaning yaqin o‘yinlarida ishtirok etishi hozircha so‘roq ostida.
Edegor Portugaliyaga qarshi uchrashuv yakunida Bernardu Silva bilan to‘qnashuvdan keyin jarohat olgan. O‘yindan so‘ng norvegiyalik futbolchi stadionni oqsab tark etgan.
Norvegiya terma jamoasi bosh murabbiyi Stole Solbakken milliy jamoa va «Arsenal» tibbiy shtablari futbolchining holati bo‘yicha doimiy ravishda ma’lumot almashib turganini bildirdi.
Seshanba kuni Edegorning ahvoli biroz yaxshilangan. Bosh murabbiy yordamchisi Brede Xangelannning aytishicha, futbolchining to‘pig‘idagi og‘riq avvalgi kunga nisbatan ancha kamaygan.
Norvegiya terma jamoasi payshanba kuni Uelsga qarshi maydonga tushadi, yakshanba kuni esa Portugaliya bilan bahs olib boradi.
