«Ювентус» ярим ҳимоячиси Тён Копмейнерс яқин трансфер ойнасида жамоани тарк этиши мумкин. Бу ҳақда La Gazzetta dello Sport хабар берди.

Манба маълумотига кўра, Италия клубида нидерландиялик футболчининг ўйинидан кўнгил қолган. У «Ювентус»га келганидан буён ўзини тўлиқ намоён қила олмаган. Таъкидланишича, туринликлар Копмейнерс сотувидан камида 25 миллион евро ишлаб олишни режалаштирмоқда.

Ёзда футболчини харид қилишга фақат «Бешиктош» ҳаракат қилган, аммо турк клуби ярим ҳимоячини Туркияга кўчиб ўтишга кўндира олмаган. Шу сабабли «Ювентус» қишки трансфер ойнасида уни ижарага бериш вариантларини ҳам кўриб чиқиши мумкин.

Копмейнерсга «Галатасарой», «Монако», «Эвертон» ва «Ньюкасл» клублари қизиқиш билдирмоқда. Шунингдек, Саудия Арабистонининг бир неча жамоаси ҳам футболчини кузатиб бормоқда.

Жорий мавсумда Копмейнерс барча мусобақалар доирасида олтита ўйинда майдонга тушиб, битта гол урди ва битта голли узатмани амалга оширди.