Англия футболида фожиали хабар — "Манчестер Сити"нинг собиқ иқтидорли футболчиси Кортни Меппен-Уолтерс 32 ёшида ҳаётдан кўз юмди.
Ўтган ўн йиллик бошларида у катта умид билдирган футболчилардан бири эди. Меппен-Уолтерс Англия ёшлар терма жамоасига ҳам чақирилган ва ҳатто жамоа сардори бўлган.
Бироқ 2012 йил сентябрида содир бўлган оғир автоҳалокат унинг ҳаёти ва фаолиятини кескин ўзгартириб юборди. Икки киши ҳалок бўлган авария вақтида у эндигина 18 ёшга тўлган эди. Меппен-Уолтерс 16 ойга озодликдан маҳрум қилинди.
Шундан сўнг "Манчестер Сити" у билан шартномани узайтирмади ва ёш футболчи фаолиятини деярли бошидан бошлашга мажбур бўлди.
Кейинги йилларда у асосан қуйи лигаларда ўйнаб, фаолиятини тиклашга ҳаракат қилди. Меппен-Уолтерс бир қатор клубларда, жумладан "Карлайл Юнайтед" ва "Стокпорт" сафида тўп сурди. Сўнгги вақтларда эса ўзининг туғилган шаҳри жамоаси "Бери" шарафини ҳимоя қилаётган эди.
Футболчининг ўлим сабаби ҳозирча маълум қилинмаган.
