«Милан»нинг собиқ германиялик ҳужумчиси Оливер Бирхофф клубдаги фаолияти, хусусан, жамоа раҳбарияти билан муносабатларини ёдга олди.

У клуб президенти Сильвио Берлускони билан камдан-кам кўришган, унинг биринчи ёрдамчиси Адриано Галлиани билан эса анча кўп мулоқот қилган.

«Биз унчалик кўп учрашмаганмиз, чунки у ўша пайтда сиёсат билан ҳам шуғулланаётган эди. Аммо у ҳақиқий жентльмен эди. Уни икки-уч марта, жумладан, фарзандлари билан бирга кўрганман. Галлиани эса жуда иштиёқли инсон.

У билан ҳар сафар учрашганимдан хурсанд бўламан. Айнан у мени “Милан”га ўтишга кўндирган», — дея Бирхоффнинг сўзларини келтиради pianetamilan.it.