«Тоттенхэм» «Атлетико» ҳужумчиси Хулиан Альваресни қўлга киритиш учун йирик трансферни амалга оширишни режалаштирмоқда.
El Nacional маълумотига кўра, Лондон клуби аргентиналик футболчи учун 130 млн евро таклиф қилишга тайёр. «Тоттенхэм» бу трансферни қишки трансфер ойнасида амалга ошириш имкониятини кўриб чиқмоқда.
Манба таъкидлашича, лондонликлар Альваресни кўндириш учун унинг шартномасига ўзига хос банд киритишни ҳам режалаштирган. Ушбу шарт келажакда футболчининг «Барселона»га ўтишини осонлаштириши мумкин.
26 ёшли ҳужумчининг «Атлетико» билан амалдаги шартномаси 2030 йилгача мўлжалланган. Илгари мадридликлар Альваресни сотишга тайёр эмаслигини билдирган ва унинг шартномасидаги товон пули жуда юқори экани хабар қилинган.
Шу билан бирга, Альвареснинг «Барселона»га ўтиши ҳақидаги хабарлар сўнгги ойларда бир неча бор тарқалган. Аргентиналикнинг ўзи ҳам ёзда клубини алмаштириш истагини билдирган эди.
Ҳозирча «Тоттенхэм», «Атлетико» ёки футболчининг вакиллари томонидан 130 млн евролик таклиф расман тасдиқлангани йўқ. Шу сабаб бу маълумот ҳозирча трансфер миш-миши сифатида баҳоланмоқда.
