«Tottenxem» «Atletiko» hujumchisi Xulian Alvaresni qo‘lga kiritish uchun yirik transferni amalga oshirishni rejalashtirmoqda.

El Nacional ma’lumotiga ko‘ra, London klubi argentinalik futbolchi uchun 130 mln yevro taklif qilishga tayyor. «Tottenxem» bu transferni qishki transfer oynasida amalga oshirish imkoniyatini ko‘rib chiqmoqda.

Manba ta’kidlashicha, londonliklar Alvaresni ko‘ndirish uchun uning shartnomasiga o‘ziga xos band kiritishni ham rejalashtirgan. Ushbu shart kelajakda futbolchining «Barselona»ga o‘tishini osonlashtirishi mumkin.

26 yoshli hujumchining «Atletiko» bilan amaldagi shartnomasi 2030 yilgacha mo‘ljallangan. Ilgari madridliklar Alvaresni sotishga tayyor emasligini bildirgan va uning shartnomasidagi tovon puli juda yuqori ekani xabar qilingan.

Shu bilan birga, Alvaresning «Barselona»ga o‘tishi haqidagi xabarlar so‘nggi oylarda bir necha bor tarqalgan. Argentinalikning o‘zi ham yozda klubini almashtirish istagini bildirgan edi.

Hozircha «Tottenxem», «Atletiko» yoki futbolchining vakillari tomonidan 130 mln yevrolik taklif rasman tasdiqlangani yo‘q. Shu sabab bu ma’lumot hozircha transfer mish-mishi sifatida baholanmoqda.