"Борнмут" ҳужумчиси Эли Жуниор Крупи оёқ жароҳатидан сўнг 25 октябрь куни сафга қайтиши кутилмоқда. Айнан шу куни "Борнмут" "Олд Траффорд"да "Манчестер Юнайтед" меҳмони бўлади, дея хабар беради L'Equipe.
Июль ойи охирида жарроҳлик амалиётини ўтказган 20 ёшли футболчи шу ҳафта охирида машғулот майдонига қайтди. У югуриш машқлари ва кичик майдондаги ўйинларни навбатма-навбат бажармоқда.
Клуб унинг тикланиш жараёнида ҳеч қандай таваккал қилмоқчи эмас. Бироқ ҳозирги режага кўра, Крупининг қайтиши "Манчестер Юнайтед"га қарши учрашувга тўғри келиши мумкин.
Крупи ўтган мавсумда Англия Премьер-лигасида 33 та учрашувда 13 та гол уриб, ўзини ёрқин намоён қилди. Унга "Арсенал" ва "Барселона" қизиқиш билдирмоқда.
Ёш ҳужумчи келажакда Европанинг топ-клубларидан бирига ўтишни мақсад қилган.
