Бразилия терма жамоасининг собиқ футболчиси Виллиан 2020 йилда «Челси»дан «Арсенал»га ўтгани ҳақида гапириб, бу қарор хато бўлганини тан олди. У Лондон клубига келганидан атиги уч ой ўтиб, жамоани тарк этишни истаганини айтди.

«Мен Артета ва клубдаги бошқа одамлар билан учрашдим. Артета менга: «Биз мана шундай ўйнаймиз, сен эса жамоанинг асосий футболчиларидан бири бўлишингни хоҳлайман. Жамоани сенинг атрофингда қураман», деди. Мен уч йиллик шартнома имзоладим, аммо кейин ҳаммаси режадагидек кетмади», — деди Виллиан.

Бразилиялик футболчининг айтишича, у янги клубда жуда тез ҳафсаласи пир бўлган. Бунга трансфер олдидан берилган ваъдалар билан амалдаги вазият ўртасида катта фарқ бўлгани сабаб бўлган.

«Агар ўзингни бахтли ҳис қилмасанг, ҳақиқий даражангни кўрсата олмайсан. Пул бахтни сотиб ололмайди. Бу фаолиятимдаги энг яхши шартнома эди, аммо мен бахтли эмасдим», — деди у.

Шу билан бирга, Виллиан Артетага нисбатан ҳеч қандай ёмон муносабати йўқлигини таъкидлади.

«У майдонда жуда яхши мураббий, ғоялари ажойиб. Аммо жамоани бошқаришда айрим жиҳатлар етишмасди. Инсоний ёндашув — айнан шу нарса камлик қиларди. Мен доим ҳазиллашиб: «Менга орзу сотишди, аммо у унчалик яхши орзу эмас экан», дейман», — деди Виллиан.

«Арсенал»га ўтишидан олдин Виллиан «Челси» сафида етти йил тўп сурган.