Тожикистон терма жамоаси ўртоқлик учрашувида Хитой устидан минимал ҳисобда ғалаба қозонди. Ягона гол иккинчи бўлимда урилди, Хитой терма жамоаси эса учрашувни камчиликда якунлади.
Голсиз ўтган биринчи бўлимдан сўнг 53-дақиқада ҳисоб очилди. Тожикистон ҳимоячиси Ваҳдат Ҳанонов ўз имкониятидан унумли фойдаланиб, тўпни рақиб дарвозасига йўллади ва меҳмонларни олдинга олиб чиқди.
Хитой ҳисобни тенглаштиришга ҳаракат қилди, аммо кўп ўтмай янада қийин вазиятга тушиб қолди. 59-дақиқада Шихао Вэй қизил карточка олди ва муддатидан аввал майдонни тарк этди. 10 киши бўлиб қолган мезбонлар иккинчи голни ўтказиб юбормасликка ҳаракат қилишга мажбур бўлди.
Тожикистон сон жиҳатдан устунликдан фойдаланди ва якуний ҳуштакка қадар минимал устунлигини сақлаб қолди.
