«Манчестер Юнайтед»нинг афсонавий собиқ бош мураббийи сэр Алекс Фергюсон Криштиану Роналду ва Уэйн Руни биргаликда тўп тепган даврда Европанинг энг кучли ҳужумкор жуфтлигини ташкил этганини таъкидлади.

Шотландиялик мутахассис ўзининг «Ҳаётим ўйинлари» (Games of My Life) номли хотиралар китобида икки футболчининг майдондаги ўзаро тушуниши ва ҳамкорлиги ҳақида фикр билдирган.

Фергюсон бунинг ёрқин мисоли сифатида 2007 йилда «Болтон Уондерерс»га қарши учрашувда амалга оширилган қарши ҳужумни эслаган.

Унинг фикрича, айнан ўша вазият Роналду ва Рунининг бир-бирини қанчалик яхши тушунгани ҳамда ҳужумда қандай кучли ҳамкорлик қилганини намоён этган.

«Ўша даврда бу икки футболчи Европанинг энг яхшилари эди, деб ҳисоблайман. Бунга чин дилдан ишонаман», — дея таъкидлаган Фергюсон.

Шунингдек, тажрибали мутахассис 2018 йилда бош миясида ўтказилган шошилинч жарроҳлик амалиётидан сўнг илк бор «Олд Траффорд» стадионига қайтганида бошидан кечирган ҳиссиётларини ҳам эслаган.

Фергюсон «Вулверхэмптон»га қарши учрашувга ташриф буюрганида қаттиқ ҳаяжонланганини тан олган.

Унинг таъкидлашича, мухлислар томонидан кўрсатилган улкан меҳр-муҳаббат ва самимий кутиб олиш ҳаётидаги энг фахрли ҳамда унутилмас лаҳзалардан бири бўлган.

Мазкур воқеа «Манчестер Юнайтед»ни 26 йил давомида бошқарган мураббийнинг клуб тарихида қолдирган улкан меросини яна бир бор намоён этган.

Маълумот учун, Уэйн Руни «Манчестер Юнайтед» тарихидаги энг яхши тўпурар ҳисобланади. У клуб сафида 559 та учрашувда майдонга тушиб, 253 та гол урган.

Руни ва Роналдунинг самарали ҳамкорлиги «Манчестер Юнайтед»нинг 2008 йилда УЕФА Чемпионлар лигасида ғолиб чиқишида ҳам муҳим ўрин тутган.