Мадриднинг «Реал» клуби бош мураббийи Жозе Моуриньо Винисиус Жуниорнинг жорий мавсум бошидаги ишончсиз ўйини ҳақида фикр билдириб, бразилиялик ҳужумчини ҳимоя қилди.

«Винисиус ўзининг энг яхши ўйинини кўрсатишни, учрашувлар тақдирини ҳал қиладиган футболчи бўлишни хоҳлаётганини, аммо бунинг уддасидан чиқа олмаётганини англаш менга оғир ботмоқда.

У нималарни бошдан кечираётганини кўриш мен учун оғриқли.

Мени ҳайратда қолдирган жиҳати шуки, Винисиус ниҳоятда профессионал футболчи экан. У аввалги даражасига қайтиш учун жуда қаттиқ меҳнат қилмоқда.

Мен «Реал» мухлисларини ҳурмат қиламан. Бироқ айрим одамлар бошқаларнинг таъсири остида Винисиусни қўллаб-қувватламаётганини кўрганимда, юрагим эзилади.

У фақат бир нарсани истайди — «Реал» мухлисларига шунчалик кўп қувонч улашган аввалги Винисиусга айланишни», — деди Моуриньо журналистларга.

Винисиус Жуниор жорий мавсумда барча мусобақалар доирасида саккизта учрашувда майдонга тушиб, битта гол урган ва учта голли узатмани амалга оширган.