«Барселона» бош мураббийи Ханс-Дитер Флик Испания Ла Лигасининг навбатдаги турида «Хетафе»га қарши учрашувда қайси дарвозабон майдонга тушиши ҳақидаги саволга жавоб берди.
Аввалроқ каталонияликларнинг асосий дарвозабони Жоан Гарсия бир неча ҳафта олдин олган жароҳатидан сўнг ҳамон ноқулайлик ҳис қилаётгани ҳақида хабар берилган эди.
«Биз доимо бошланғич таркибнинг турли вариантларини кўриб чиқамиз.
Бироқ бугун жуда ижобий ҳолатларни кўрдик. Шунинг учун Жоан Гарсия учрашувни дастлабки дақиқалардан бошлайди, деб ўйлайман», — деди германиялик мутахассис журналистларга.
25 ёшли Гарсия жорий мавсумда барча мусобақалар доирасида еттита учрашувда майдонга тушиб, олтита гол ўтказиб юборган.
Шунингдек, у учта ўйинда ўз дарвозаси дахлсизлигини сақлаб қолган.
«Барселона» Испания чемпионатининг саккизинчи тури доирасида 10 октябрь куни ўз майдонида «Хетафе»ни қабул қилади.
