«Barselona» bosh murabbiyi Xans-Diter Flik Ispaniya La Ligasining navbatdagi turida «Xetafe»ga qarshi uchrashuvda qaysi darvozabon maydonga tushishi haqidagi savolga javob berdi.
Avvalroq kataloniyaliklarning asosiy darvozaboni Joan Garsiya bir necha hafta oldin olgan jarohatidan so‘ng hamon noqulaylik his qilayotgani haqida xabar berilgan edi.
«Biz doimo boshlang‘ich tarkibning turli variantlarini ko‘rib chiqamiz.
Biroq bugun juda ijobiy holatlarni ko‘rdik. Shuning uchun Joan Garsiya uchrashuvni dastlabki daqiqalardan boshlaydi, deb o‘ylayman», — dedi germaniyalik mutaxassis jurnalistlarga.
25 yoshli Garsiya joriy mavsumda barcha musobaqalar doirasida yettita uchrashuvda maydonga tushib, oltita gol o‘tkazib yuborgan.
Shuningdek, u uchta o‘yinda o‘z darvozasi daxlsizligini saqlab qolgan.
«Barselona» Ispaniya chempionatining sakkizinchi turi doirasida 10 oktyabr kuni o‘z maydonida «Xetafe»ni qabul qiladi.
