Лондоннинг “Челси” клуби Англия терма жамоаси ярим ҳимоячиси Коул Палмер билан ҳамкорликни яна бир йилга узайтирди. Бу ҳақда клуб матбуот хизмати маълум қилди.

24 ёшли футболчининг янги шартномаси 2034 йилнинг ёзига қадар амал қилади. Аввалги келишув 2033 йилда якунланиши керак эди. Янги битимга кўра, Палмернинг молиявий шартлари ҳам яхшиланган.

Англиялик футболчи 2023 йилнинг сентябрь ойида “Манчестер Сити”дан “Челси”га кўчиб ўтган. У қисқа вақт ичида Лондон клубининг асосий футболчиларидан бирига айланди.

Палмер “Челси” сафида барча мусобақалар доирасида 138 та учрашувда иштирок этиб, 91 та голли ҳаракатни амалга оширган. Шунингдек, у жамоа билан Конференциялар лигаси ва клублар ўртасидаги жаҳон чемпионатида ғолиб чиққан.

Футболчи янги шартнома имзолаш қарорига клуб раҳбарияти ва мураббийлар штаби билан ўтказилган музокаралар таъсир қилганини таъкидлади. У “Челси”нинг келажагига ишонишини ҳамда жамоадошлари билан йирик совринлар учун курашиш ниятида эканини билдирди.

Жорий мавсумда Палмер Англия Премьер-лигасида 7 та учрашувда 4 та гол ва 2 та голли узатмани ўз ҳисобига ёздирган.