Хорватиялик тажрибали ярим ҳимоячи Лука Модрич узоқ йиллар давомида юқори савияда тўп суриб келаётганининг асосий сабабларидан бири ҳақида гапирди.

41 ёшли футболчи ҳануз юқори даражада ўйнашда давом этмоқда. Унинг таъкидлашича, фаолиятини давом эттиришга ундаётган асосий омиллар — футболга бўлган муҳаббат ва ғалабага интилиш.

"Мен доим бир гапни айтаман: ғалаба таъмини бир марта тотган инсон бу туйғуни яна ва яна ҳис қилишни истайди.

Мени олдинга ундайдиган асосий куч айнан шу. Энг аввало, ўз ишимга бўлган муҳаббатим.

Мендан кўпинча муваффақиятимнинг сири нимада эканини сўрашади. Аслида ҳеч қандай сир йўқ. Менимча, энг муҳими — қилаётган ишингни севиш ва унга бор кучингни бағишлаш.

Мен кунига деярли 24 соат футбол билан яшайман. Айнан шу нарса мени олдинга етаклайди, яна ғалаба қозонишга интилишга ва курашни давом эттиришга ундайди.

Чунки мен рақобатни жуда яхши кўраман ва доимо бошқалар билан беллашишни истайман", — дея Модричнинг сўзларини келтиради Pianeta Milan нашри.

Эслатиб ўтамиз, Лука Модрич фаолиятининг катта қисмини Мадриднинг "Реал" клубида ўтказган. Хорватиялик футболчи кўп йиллар давомида мадридликлар шарафини ҳимоя қилган.